Ազատորեն արված բարության փոքր քայլերը կարող են օգտակար լինել առողջությանն ու հոգեկանին
Բարության փոքր ու անակնկալ քայլերը ոչ միայն հաճելի են ստացողի համար, այլև դրական ազդեցություն են թողնում անողի վրա։ Հոգեբանական հետազոտությունները ցույց են տալիս, որ նման վարքագիծը բարձրացնում է ինքնազգացողությունն ու կյանքից բավարարվածությունը։ Մասնագետները նշում են, որ այդ ազդեցությունը նկատվում է թե՛ հարազատների, թե՛ անծանոթների նկատմամբ դրսևորված ուշադրության դեպքում։
Բարության փոքր քայլերը հաճախ ընկալվում են իբրև առօրյա դրվագներ, սակայն հոգեբանական ուսումնասիրությունները վկայում են, որ դրանց ազդեցությունը խորն է։ Մարդիկ, ովքեր գիտակցաբար օգնում են ուրիշներին, մեծ հավանականությամբ զգում են ավելի բարձր ինքնազգացողություն և ներքին բավարարվածություն։
Բարությունը՝ որպես երկկողմանի ազդեցություն
Վերջին տասնամյակների հետազոտությունները ցույց են տալիս, որ անշահախնդիր օգնությունը օգտակար է և՛ ստացողի, և՛ տվողի համար։ Ուսումնասիրությունների համակարգված ամփոփումը, որը ներառել է 24 աշխատանք, արձանագրել է, որ բարեսրտ գործողությունները բարձրացնում են օգնողի բարեկեցությունը։
Մեկ այլ հետազոտություն, որտեղ մասնակիցները մեկ շաբաթ շարունակ նպատակային կերպով փորձում էին լավություն անել ուրիշներին, պարզել է, որ դրական արդյունքը կախված չէ հարաբերությունների մոտիկությունից։ Նույնպիսի օգուտ է արձանագրվել թե՛ ընտանիքի անդամների ու ընկերների, թե՛ պատահական անցորդների կամ անծանոթների նկատմամբ դրսևորված ուշադրության դեպքում։
Ինչու է դա կարևոր հոգեբանության մեջ
Թրաւմային հոգեբանության ոլորտում երկար տարիներ աշխատած մասնագետների համոզմամբ՝ բարությունը ոչ միայն բարոյական, այլև գործնական արժեք ունի։ Այն ամրապնդում է սոցիալական կապերը, նվազեցնում մեկուսացման զգացումը և ստեղծում փոխադարձ վստահության միջավայր։
Kindlab հետազոտական թիմի ղեկավար Օլիվեր Սքոթ Քյուրին և նրա գործընկերները ուսումնասիրում են բարության պատճառներն ու հետևանքները՝ փորձելով մշակել գործիքներ, որոնք կօգնեն մարդկանց ավելի հաճախ կիրառել այդ վարքագիծը։ Նրանց առաջարկած «Բարության գործակից» հարցաթերթիկը թույլ է տալիս կարճ ժամանակում գնահատել, թե մարդը որքան է հակված նման քայլերի՝ համեմատած մյուսների հետ։
Փոքր արարքներ, մեծ ազդեցություն
Մասնագետները շեշտում են, որ բարության համար հարկավոր չեն մեծ միջոցներ կամ առանձնահատուկ պայմաններ։ Մեկ բաժակ սուրճ վճարել հերթում կանգնածի համար, դուռը պահել ծանր պայուսակներով մարդու առաջ կամ պարզապես ողջունել անծանոթին՝ արդեն կարող է դրական փոփոխություն առաջացնել։
Այս դիտարկումը հատկապես կարևոր է մի ժամանակաշրջանում, երբ շատ մարդիկ ապրում են սթրեսի, արագության և սոցիալական լարվածության պայմաններում։ Փոքր, գիտակցված բարի արարքները կարող են դառնալ ոչ միայն մարդկային հարաբերությունների, այլև հոգեկան առողջության պահպանման պարզ ու հասանելի միջոց։
Աղբյուր՝ Time Magazine