ՄՌՆԹ նոր պատվաստանյութը կարող է օգնել melanoma-ի բուժման մեջ
Բրիտանիայում ներկայացված նոր կլինիկական տվյալները ցույց են տալիս, որ անհատականացված մՌՆԹ պատվաստանյութը կարող է օգնել բարձր ռիսկի մելանոմայով հիվանդներին՝ նվազեցնելով ուռուցքի վերադարձի հավանականությունը։ Moderna-ի և Merck-ի մշակած intismeran դեղամիջոցը կիրառվել է իմունոթերապիայի հետ համատեղ։ Թեև արդյունքները խոստումնալից են, դեռ պարզ չէ, թե որքան երկար կարող է հիվանդներին պահել քաղցկեղից ազատ վիճակում։
Բրիտանիայում հրապարակված նոր տվյալները վկայում են, որ անհատականացված մՌՆԹ պատվաստանյութը կարող է նշանակալի դեր ունենալ բարձր ռիսկի մելանոմայի բուժման մեջ։ Moderna-ի և Merck-ի մշակած intismeran դեղամիջոցը կիրառվել է այլ բուժման հետ համատեղ և նախնական արդյունքներով կարող է երկարացնել այն ժամանակահատվածը, երբ հիվանդը մնում է քաղցկեղից ազատ։
Ինչ է ցույց տվել փորձարկումը
Փորձարկումը ներառել է ավելի քան 1000 հիվանդի՝ առաջադեմ մելանոմայով։ Նրանց մի մասն ունեցել է մեկ հատվածում մեծ ուռուցքներ, իսկ մյուսների դեպքում հիվանդությունը տարածված է եղել մարմնի այլ մասեր։ Հիվանդությունն ուսումնասիրողները նշում են, որ այս փուլում ստացված արդյունքները խոստումնալից են, սակայն դեռ վաղ է վերջնական եզրակացություններ անել բուժման երկարաժամկետ ազդեցության մասին։
Մելանոման մաշկի քաղցկեղի ամենաագրեսիվ ձևն է և, ըստ հրապարակված տվյալների, Միացյալ Թագավորությունում տարեկան շուրջ 2600 մահվան պատճառ է դառնում։ Հիվանդության ծանր ձևերի դեպքում հնգամյա գոյատևումը դեռևս սահմանափակ է, ինչի պատճառով նոր մոտեցումները մեծ հետաքրքրություն են առաջացնում բժշկական համայնքում։
Ինչպես է գործում անհատականացված մՌՆԹ պատվաստանյութը
Բուժման սկզբում բժիշկները հեռացնում են հիվանդի ուռուցքը, ապա նրա ԴՆԹ-ն ուսումնասիրում են մուտացիաներ հայտնաբերելու համար։ Այդ մուտացիաները կարող են ձևավորել աննորմալ սպիտակուցներ՝ նեոանտիգեններ, որոնք իմունային համակարգը տեսականորեն կարող է ճանաչել որպես վտանգավոր։ Պատվաստանյութը կազմվում է հենց այդ առանձնահատկությունների հիման վրա՝ յուրաքանչյուր հիվանդի համար առանձին։
Օքսֆորդի համալսարանի խորհրդատու բժշկական ուռուցքաբան Լենարդ Լիի խոսքով՝ սա քաղցկեղի բուժման նկատմամբ սկզբունքորեն նոր մոտեցում է, քանի որ միևնույն դեղամիջոցի փոխարեն բուժումը հարմարեցվում է կոնկրետ մարդու ուռուցքի գենետիկ «դրոշմին»։ ՄՌՆԹ տեխնոլոգիան իմունային համակարգին տալիս է ցուցումներ, որպեսզի այն, հատկապես T բջիջների միջոցով, սովորի ճանաչել և թիրախավորել ուռուցքային բջիջները։
Ինչ է սպասվում առաջիկայում
Մասնագետների գնահատմամբ՝ նման պատվաստանյութերը կարող են առավել արդյունավետ լինել այն իրավիճակներում, երբ հիվանդության բեռը համեմատաբար ցածր է, իսկ ուռուցքը դեռ վերահսկելի է։ Ներկայում նման մոտեցումները փորձարկվում են նաև քաղցկեղի այլ տեսակների դեպքում, այդ թվում՝ ենթաստամոքսային գեղձի, քաղցկեղի, երիկամի և միզապարկի համար։
Mount Sinai բժշկական դպրոցի իմունոթերապիայի տնօրեն Նինա Բհարդվաջը նշել է, որ սա քաղցկեղի իմունոթերապիայի համար կարևոր փուլ է։ Ըստ նրա՝ պատվաստանյութերը կարող են նշանակալի արդյունք տալ հատկապես այն դեպքերում, երբ հիվանդության տարածվածությունը սահմանափակ է, և նման տեխնոլոգիաների կիրառման ոլորտը ապագայում կարող է ընդլայնվել տարբեր ուռուցքային հիվանդությունների վրա։
Աղբյուր՝ The Independent